Rođena u Zagrebu gdje živim u zimskim mjesecima a preostali dio godine uživam na otok Hvaru. Bavim se turizmom, izradom prirodne kozmetike i ljekovitih pripravaka, melema, krema, ulja, sapuna itd. i imam mnogo hobija od kojih mi je jedan i pisanje pjesama. Volim prirodu, šetnje, zabavu, druženje, dobru hranu
***
SVE IZBLIDI
Izblidi i korica libra
Zlotom ispletena
Izblidi i darvo
Suncem ogrijono
Izblidi i vešta
Nojlipja iznošena.
Izblidi sve:
I srića izblidi
Ako ni veća od pensirih.
I radost izblidi
Ako se ne dili.
Izblidi i jubov
Ako ni od sarca dota.
Izblidi i žalost
Od koruta.
Izblidi i duša
Prodona i kruta.
Izblidi i vrime ča ga život nosi
Izblidi kad i ne znoš ko si.
Izblidi i pamet i lavuri pusti
Sve se ponovo zapusti.
Izblidi i višta i sve izblidi
Koda i ni bilo ništa
I koda ništa ne vridi.
Somo izblidit ne more
I kad misliš nojgore
Noda u sarcu ča te grije
Jakost ti i viru ulije.
***
CVIT
Podno razvoljene gomile
Usrid trove nepokošene
Jedva da se ga i more vidit
Izreso je rumen cvit.
O da somo moreš vidit
Kako je lip.
Roson umiven
Zlotnin suncen ogrijon
reste ponosit
U bušku od svih sakriven
nojlipji cvit.
***
KOMU ĆU
Komu ću pisat pisme
U gluho muklo vrime
Kad zaspi i stina u moru
I kad se ni doh ne čuje.
Komu ću pisat pisme
Od pine morske
Ispletene i jutron
Na žolu razlivene.
Komu?
Komu ću ih štit, za
Koga ih pisat?
Od sriće ne moć disat.
Komu ću šapjat u uho
Sve ča duša nosi
Kome ću taknit znamen
Dok gazimo po rosi
Komu?
Komu ću zavikat
Komu ću se nasmijat
Komu ću jubov dat
Od koga je iskat.
Komu ću vrime krast
Pod grone murve stat
I na vas glos zakantat
Ko će me čut???
Ko, ako ne ti